
大寶伏藏TD1971ངག་འགྲོལ་གསེར་གྱི་ལྡེའུ་མིག་གི་གཞུང་མངོན་རྟོགས་དང་བཅས་པ་བཞུགས༔ ཞི་བའི་ལས་བྱད་འགྲོལ། རྩ་གཞུང་།
47-42-1a
༄༅། །ངག་འགྲོལ་གསེར་གྱི་ལྡེའུ་མིག་གི་གཞུང་མངོན་རྟོགས་དང་བཅས་པ་བཞུགས༔ ཞི་བའི་ལས་བྱད་འགྲོལ། རྩ་གཞུང་།
༄༅༔ ངག་འགྲོལ་གསེར་གྱི་ལྡེའུ་མིག་གི་གཞུང་མངོན་རྟོགས་དང་བཅས་པ་བཞུགས༔ 
47-42-1b
བྱད་དང་ངག་འགྲོལ་བའི་གདམས་པ་འདི་ལ༔ དང་པོ་བུམ་པའི་ནང་དུ་ཆུ་གཙང་མ་དང་གཙང་པོའི་ཆུ་བླུག་གོ༔ བ་དམར་པོའི་འོ་མ་དང་ཆུ་བླུག༔ བུམ་པའི་རྫས་ནི༔ རབ་གུ་རུ་ཡབ་ཡུམ་གྱི་བྱང་སེམས་དཀར་དམར༔ མེད་ན་སྔགས་པ་ནུས་པ་ཅན་དང་༔ བུད་མེད་རིགས་བཟང་མོ་དེ་གཉིས་ཀྱི་བྱང་སེམས་དཀར་དམར་ལ་བྱའོ༔ ཡང་ན་རང་གི་དེ་ལ་བྱའོ༔ བདུད་རྩི་སྨན་སྒྲུབ་ཀྱི་ཨ་མྲྀ་ཏ་དང་༔ བཟང་དྲུག་བསྲེའོ༔ གླ་རྩི༔ ཤིང་ཀུན༔ རམ་གྱི་ཕྱི་མོ༔ རྒྱ་ཚྭ༔ ཕག་མ་ཤི་བའི་སྣ༔ དེ་ཡང་དབུགས་མ་ཆད་ཙམ་ལ་བྲེག་པར་བྱའོ༔ ཤིང་ཉ་སྦྲིད་མ༔ གཡེར་མའི་འབྲུ་གུ་ནག་པོ་བདུན༔ སྐྱེར་པའི་འབྲུ་གུ་བདུན༔ ཤ་བའི་རྭ་བདར་བའི་ཕྱེ་མ་དུམ་གཅིག༔ བྱ་ངང་པའི་ཤ་དུམ་གཅིག༔ སྦྲང་རྩི༔ རྫས་དེ་རྣམས་བསྲེས་ཏེ་ཕྱེ་མར་བྱས་ལ་བུམ་པར་བླུག་གོ༔ དེ་ཡིས་བུམ་ཆུ་ངར་བླུད་པའོ༔ རྫས་དང་སྔགས་ཀྱི་ནུས་པས་ཕྲ་མེན་འགོང་ཆོག་གི་རིགས་ཐམས་ཅད་སྟན་དུ་བཏིང་ཡང་རང་ལ་གནོད་མི་ནུས་སོ༔ དུས་ནི་སྐར་མ་རྒྱལ་དང་གཟའ་ཕུར་བུ་འཛོམ་པའི་ཉི་མ་ལ་བྱའོ༔ དེ་མ་འཛོམ་ན་རྒྱལ་གྱི་ཉི་མ་རྩེ་ཤར་ལ་བྱའོ༔ རྒྱལ་ནམ་བྱུང་དུས་སུ་ཡང་བྱའོ༔ སྤོས་ཀྱི་དུད་པ་བཏང་ཞིང་སྔགས་བཟླའོ༔ རབ་ཉི་ཤུ་རྩ་གཅིག༔ འབྲིང་བཅུ་བཞི༔ ཐ་མ་བདུན་བཟླའོ༔ སྔགས་
47-42-2a
ཆུ་བུམ་པའི་ནང་དུ་བླུག་གོ༔ དེ་ནས་རང་གི་འཁོར་རྣམས་འཁྲུ་བ་དང་འཐུང་བར་བྱའོ༔ དེས་རང་དང་མི་ཕྱུགས་འཁོར་དང་བཅས་པ་འཁྲུ་བ་དང་གཏོར་བ་སོགས་བྱས་པ་དེ་ཡི་ནུས་པས་རང་དང་མི་ཕྱུགས་བཟའ་བྲན་འཁོར་དང་བཅས་པ་ལ་བན་བོན་དང་སྔགས་ཀྱི་མཐུ་དང་ལུས་ངག་ཡིད་གསུམ་མནན་པ་དང་༔ བཅིངས་པ་དང་། བསྡམས་པ་དང་༔ ཕྲ་མེན་གྱི་རིགས་ཐམས་ཅད་ཀྱིས་གནོད་མི་ནུས་སོ༔ སྔགས་ཀྱི་ནུས་པ་སྐྱེ་བ་གསུམ་དུ་མེད་པར་བྱས་པ་ཡང་ལན་གཅིག་གིས་གྲོལ་བར་འགྱུར་རོ༔ རང་གི་ནུས་པ་མཆོག་ཏུ་རྒྱས་པར་འགྱུར་རོ༔ རང་གིས་སྔགས་བཟླས་པ་རྣམས༔ བརྒྱ༔ སྟོང་༔ ཁྲི༔ འབུམ༔ བྱེ་བ༔ ས་ཡ༔ དུང་ཕྱུར་དུ་འཕེལ་ལོ༔ རང་གི་ཆོས་སྐྱོང་གི་རྟེན་ལ་གཏོར་རོ༔ ཁྱིམ་དང་སྒྲུབ་ཁང་གི་བྱང་ཕྱོགས་སུ་གཏོར་རོ༔ ཐེམ་པ་དང་སྲང་ཁ་ལ་གཏོར་རོ༔ རང་གི་མལ་ས་དང་ས་ཕྱོགས་འདི་རུ་གནོད་པ་བྱས་སམ་སྙམ་པ་ལ་གཏོར་རོ༔ དེས་རང་གི་སྲུང་མ་གཤེད་དུ་བབས་པ་རྣམས་རང་གྲོལ་དུ་འགྲོའོ༔ ཞིང་དང་ཁང་པ་ལ་གཏོར་ན་སེལ་གྱི་རིགས་ཀྱིས་གནོད་མི་ནུས་སོ༔ འདིའི་སྔགས་རྣམས་རབ་གསེར་གྱིས་བྲི༔ འབྲིང་དངུལ༔ ཐ་མ་མཚལ་གྱིས་བྲི༔ མ་གྲུབ་ན་སྣག་ཚས་བྲི༔ དེ་རྫའི་གྭ་འུ་སོ་བཏང་བའི་ནང་དུ་བཅུག་ལ༔ ཁང་པའི་ནང་བྱང་ཕྱོགས་སུ་སྦས་ན་ཁང་
47-42-2b
སེལ་གྱི་རིགས་ཐམས་ཅད་ཀྱིས་གནོད་པར་མི་ནུས་སོ༔ ཞིང་གི་དཀྱིལ་དུ་སྦས་ན་གོང་བཞིན་གནོད་མི་ནུས་སོ༔ རྟག་ཏུ་ལོ་ལེགས་པར་འགྱུར་རོ༔ རང་གི་ལུས་ལ་བཅངས་ན༔ གཞན་དག་གི་མཐུ་དང་༔ ནུས་པ་དང་༔ སྦྱོར་བ་ངན་པ་འགོང་ཆོག་གི་རིགས་དང་༔ སེལ་དང་མནན་པའི་རིགས་ཅི་བྱས་པས་ཀྱང་གནོད་མི་ནུས་སོ༔ གོང་བཞིན་དུ་འཐུང་བ་དང་༔ འཁྲུ་བ་དང་༔ སྔགས་ལུས་ལ་བཅངས་ན༔ ཕྲ་མེན་དང་གནོད་པའི་རིགས་ཐམས་ཅད་གདན་དུ་བཏིང་ཡང་གནོད་མི་ནུས་སོ༔ གནོད་པའི་རིགས་ཐམས་ཅད་རང་གྲོལ་དུ་འགྲོའོ༔ འདིའི་བུམ་ཆུ་ཉི་མ་རྩེ་ཤར་ལ་ནངས་མ་གཏན་དུ་འཐུང་ན༔ སྒྲུབ་པའི་རིགས་ཅི་བྱས་པ་ཡང་ཆུད་མི་ཟོས་ཏེ་མྱུར་དུ་འགྲུབ་བོ༔ སྔགས་ཀྱི་ནུས་པ་གཞན་ལས་ཆེ༔ མ་གྲུབ་པ་རྣམས་མྱུར་དུ་འགྲུབ༔ གྲུབ་པ་རྣམས་ནུས་པ་གཞན་ལས་ཆེའོ༔ རང་ལ་ཡེ་ཤེས་པ་དང་དམོད་པ་དྲག་སྔགས་ཀྱི་ལྷ་ཚོགས་རྣམས་རང་བཞིན་གྱིས་འདུའོ༔ ཅི་བཅོལ་བའི་ལས་རྣམས་བྱེད་དོ༔ བསྙེན་སྒྲུབ་ལས་སྦྱོར་གྱི་རྟགས་རྣམས་མྱུར་དུ་ཐོན་ནོ༔ རང་གཞན་གྱིས་མནན་པས་མི་ནོན༔ བཅིངས་པས་མི་འཆིང་༔ བསྡམས་པས་མི་སྡོམ༔ ཕར་ལ་མཐུ་དང་གནོད་པ་གང་བྱེད་ནུས་པ་གཞན་ལས་ཆེའོ༔ སྐྱེ་བ་གསུམ་དུ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་བྱང་ཞིང་དག་པར་འགྱུར་རོ༔ སྔགས་
47-42-3a
ཀྱི་ནུས་པ་ཐམས་ཅད་ཀྱང་མཆོག་ཏུ་བསྐྱེད་དོ༔ ངག་འགྲོལ་གྱི་རིགས་ཐམས་ཅད་ཀྱང་འདི་ལ་ཚང་༔ སྣ་རེ་ལ་བསྟན་པ་རྣམས་དང་མི་འདྲའོ༔ འཛུལ་ཆོག་གི་རིགས་ཐམས་ཅད་འདི་ལ་ཚང་༔ འཛུུལ་ཆོག་གི་འཁོར་ལོ་ལ་བརྟེན་པ་རྣམས་ཅོལ་ཆུང་ངོ་༔ འཛུལ་ཆོག་དང་ངག་འགྲོལ་འདི་ལས་ཟབ་པ་ཡོད་རེ་ཀན༔ ༈ རྟགས་ཀྱི་རིམ་པ་ནི༔ དེ་ཡང་རང་ལ་གཞན་གྱིས་ངག་མནན་པ་དང་༔ བཅིངས་པ་དང་༔ བསྡམས་པ་དང་༔ མཐུ་བྱས་པའི་རྟགས་སུ༔ ལྕེས་ལབ་མི་ཤེས་པར་སྐྲངས་པ་དང་༔ ལྐོག་མ་དང་མགུལ་པ་འགགས་ནས་ན་བ་དང་༔ སྔགས་བགྲང་མི་ཤེས་པ་དང་༔ བགྲང་ཡང་སྒྲ་མི་དག་པ་དང་༔ ལྕེ་ཡི་མདོག་འགྱུར་བ་དང་༔ རྒྱ་གྲམ་དུ་གས་པ་དང་། ཁ་བཅིངས་པར་རྨི་བ་དང་༔ ལྕེ་ལ་ཕུར་པ་བཏབ་པ་རྨི་བ་དང་༔ ཆོས་པོ་ཏིའི་འོག་དང་མཆོད་རྟེན་གྱི་འོག་ཏུ་ནོན་པ་དང་༔ དོང་གཏིང་རིང་དུ་ཚུད་པ་དང་༔ རེ་བ་ནག་པོས་བཏུམས་པ་རྨི་བ་དང་༔ མུན་པ་ནག་པོའི་ཕུགས་སུ་ཚུད་པ་དང་༔ བྲག་ཕུག་སྟོང་པ་དང་༔ ཁང་སྟོང་དང་ཡུལ་སྟོང་རྨི་བ་དང་༔ གཅིག་ནས་གཅིག་ཏུ་འཛུལ་བ་རྨི་བ་དང་༔ ཁང་སྟོང་རྡིབ་ལ་ཁད་པའི་ནང་དུ་ཕྱིན་པ་རྨི་བ་དང་༔ ཟམ་པ་དང་ལམ་རྒྱ་གྲམ་གྱི་དཀྱིལ་དུ་ཉལ་བ་རྨི་བ་དང་༔ རི་རོང་དོག་པོའི་
47-42-3b
རྩེ་ནས་རྦབ་ཏུ་ལྷུང་ལ་ཁད་པ་དང་༔ ལྷུང་བ་རྨི་བ་དང་༔ ལྷ་ཁང་དང་ལྡེར་བཟོ་རྨི་བ་དང་༔ དངོས་སུའང་རང་ཉམས་ཤེད་ཆུང་བ་དང་༔ སྔགས་བཟླ་སྙིང་མི་འདོད་པ་དང་༔ བཟླས་ཀྱང་ལྡབ་ལྡིབ་ཏུ་སོང་བ་དང་༔ སྒྲུབ་པ་བྱས་ཀྱང་ནུས་པ་ཆུང་ལ་བར་ཆད་མང་བ་དང་༔ རང་ཁྲོ་ཞིང་འཚིག་པ་ཟ་བ་དང་༔ སྙིང་མི་དགའ་བ་དང་༔ བསྐྱེད་རིམ་མི་གསལ་བ་དང་༔ ལུས་ལྕི་ཞིང་འཐིབས་པ་དང་༔ གོས་མི་གཙང་བ་གྱོན་པ་དང་༔ མི་གཙང་བའི་འདམ་རྫབ་ཏུ་ཕྱིན་པ་རྨི་བ་དང་༔ རོ་ཁུར་གྱི་གླིང་དུ་ཕྱིན་པ་དང་༔ ནད་པ་སྐྱུག་ལོག་རྨི་བ་དང་༔ མཚོ་དང་ཆུ་མིག་རླན་རློན་གྱི་འདམ་དུ་བྱིང་བ་དང་ཕྱིན་པ་རྨི་བ་དང་༔ གྲོག་པོ་ཆེན་པོའི་འོག་ཏུ་ཚུད་པ་དང་༔ ཁྱེར་ལ་ཁད་པ་དང་༔ རི་ཉིལ་བ་དང་༔ བྲག་ཕུག་གཏིང་རིང་དུ་འཛུལ་བ་རྨི་བ་དང་༔ དངོས་སུའང་ཤེས་པ་གནད་དུ་མི་ཕེབས་པར་ཡེད་ཡེད་པ་དང་༔ ལུས་ངག་ཡིད་གསུམ་མནན་པ་དང་བཅིངས་པ་དང་། བསྡམས་པ་ལྟ་བུ་དང་༔ ནང་དུ་འཐབ་མང་བ་དང་༔ རྨི་ལམ་དུ་མི་ངོ་མི་ཤེས་པ་དང་༔ མོན་པ་དང་༔ ཨ་ཙ་རས་རང་ལ་བརྒྱབ་པ་དང་༔ འཐབ་པ་དང་༔ རྡོའི་ཆར་དང་ཐོག་འབབ་པ་རྨི་བ་དང་༔ མདའ་དང་མདུང་དང་གྲི་བརྒྱབ་པ་རྨི་བ་དང་༔ རླུང་ནག་འཚུབས་པ་དང་༔ རི་གཟར་ནས་རྡོ་རྦབ་བྱུང་བ་རྨི་བ་དང་༔ དམག་མང་པོ་དང་
47-42-4a
བན་དེ་དང་སྔགས་བོན་གྱི་དམག་གིས་བསྐོར་བ་རྨི་བ་དང་༔ གཅན་ཟན་དང་བྱ་ནག་གིས་དེད་པ་རྨི་བ་དང་༔ དངོས་སུ་རང་གི་གོས་ལ་གྲིས་རྨ་བྱུང་བ་དང་༔ ལྟས་ངན་གྱི་སེམས་ཅན་བྱུང་བ་དང་༔ བུད་མེད་དང་མི་མང་པོས་མཛོ་དང་རྟ་དང་བོང་དྲེལ་ལ་སྒ་སྟོང་གཏད་ནས་རང་ལ་སྒོ་ཉལ་བྱེད་པ་རྨི་བ་དང་༔ རྟགས་དེ་རྣམས་ཚུར་རང་ལ་བྱུང་ན་མིས་རང་ལ་བྱས་པའི་རྟགས་ཏེ༔ དེ་རྣམས་ནི་མཐུ་བྱད་ཡོད་པའི་རྟགས་སོ༔ ༈ གདམས་པ་འདིའི་ལོ་རྒྱུས་ནི༔ སྔོན་རྒྱ་གར་གྱི་ཡུལ་དུ་ལས་ཀྱི་མཁའ་འགྲོས་མཛད་དེ༔ རྒྱ་གར་རྡོ་རྗེ་གདན་གྱི་བྱང་ཕྱོགས་སུ་མཆོད་རྟེན་སྔོན་པོའི་ཁྲི་འཕང་ལ་སྦས་སོ༔ རྡོ་རྗེ་གདན་གྱི་དུས་མཆོད་ལ་སློབ་དཔོན་ཁྲག་འཐུང་ནག་པོ་བྱོན་ནས་ཚོགས་ཀྱི་དགོངས་པ་མཛད་ཅིང་ཡོད་ཙ་ན༔ མཁའ་འགྲོས་ལུང་བསྟན་བྱུང་ནས་རྡོ་རྗེ་གདན་གྱི་བྱང་ཕྱོགས་ཀྱི་མཆོད་རྟེན་སྔོན་པོའི་ཁྲི་འཕང་ལ་གསང་སྔགས་ཐམས་ཅད་ཀྱི་ནུས་པ་ཉམས་པ་གསོ་བ་དང་༔ མན་ངག་མཁན་རྣམས་ཀྱི་ནུས་པ་མེད་པར་བྱ་བ་དང་༔ རང་གི་ནུས་པ་ཐམས་ཅད་མཆོག་ཏུ་སྐྱེད་པའི་གདམས་པ་ཡོད་དོ༔ ཞེས་ལུང་བསྟན་བྱུང་ནས༔ དེར་སློབ་དཔོན་གྱིས་གཟིགས་པས༔ བྱང་ཕྱོགས་ཀྱི་མཆོད་རྟེན་དེའི་ཁྲི་འཕང་ལ་མེ་སྟག་དམར་ཕྲོམ་ཕྲོམ་འདུག་པ་གཟིགས་ནས༔ དེར་མཁའ་འགྲོ་ལ་གཏོར་མ་ཕུལ་ནས༔ 
47-42-4b
དེ་ནས་གཟོང་གིས་གཡེང་བས་གསེར་གྱི་རྡོ་རྗེ་རྩེ་ལྔ་པ་གཅིག་བྱུང་ངོ་༔ དེ་བཤིགས་པའི་ནང་ནས་གསང་བའི་མན་ངག་གསང་སྔགས་ཐམས་ཅད་ཀྱི་ནུས་པ་ཉམས་པ་གསོ་བའི་མན་ངག༔ ནུས་པ་ཐམས་ཅད་མཆོག་ཏུ་སྐྱེད་པའི་མན་ངག་འདི་བྱུང་ངོ་༔ དེར་སློབ་དཔོན་ཐུགས་དགྱེས་ནས་མཁའ་འགྲོ་རྣམས་ལ་གཏོར་ཚོགས་རྒྱ་ཆེན་པོ་ཕུལ་ལོ༔ ཁྲག་འཐུང་ནག་པོས་གནུབས་བན་སངས་རྒྱས་ཡེ་ཤེས་ལ་གནང་ངོ་༔ དེས་རིམ་པར་བརྒྱུད་ནས༔ ཀོང་པོ་ལྟ་བར་གནས་པའི་བླ་མ་ཁྲོ་ཚང་འབྲུག་ལྷ་ལ༔ དགེ་བཤེས་གཡུང་དྲུང་རྒྱལ་མཚན་གྱིས་ཞུས་སོ༔ ཁོང་ལ་སྔགས་དབོན་བསོད་ནམས་རྡོ་རྗེས་ཞུས༔ དེ་ནས་སངས་རྒྱས་བློ་བདེའོ༔ འཛུལ་ཆོག་ངག་འགྲོལ་མི་ཁུར་གཅིག་ལས་འདི་ཟབ་བོ༔ བུ་སློབ་སྙིང་དང་འདྲ་བ་མ་གཏོགས་པ༔ གཞན་ལ་མ་སྤེལ་ཅིག༔ ཐམས་ཅད་ཚང་བ་འདི་མིན་པ་སུ་ལའང་མེད་དོ༔ འདི་ཡོད་ཅེས་ཁ་རུ་མ་འདོན་ཅིག༔ འདི་ནི་རང་གི་སྲོག་སྐྱོབ་ཡིན༔ འདི་དང་ལྡན་ན་གཞན་གྱིས་རང་ལ་མཐུ་དང་གནོད་པའི་རིགས་ཅི་བྱས་ཀྱང་མི་ཚུགས་སོ༔ འདི་ཡི་བུམ་ཆུས་ལྐུག་པ་དང་༔ བུ་ཆུང་ཁ་ལྗི་བ་ལན་བདུན་དུ་འཁྲུ་བ་དང་༔ འཐུང་དུ་བཅུག་ན་ཁ་སྨྲའོ༔ སྐུའི་རྒྱ་རྒྱ་རྒྱ༔ གསུང་གི་རྒྱ་རྒྱ་རྒྱ༔ ཐུགས་ཀྱི་རྒྱ་རྒྱ་རྒྱ༔ གདམས་པ་འདི་ལ་སྔགས་བཟླ་བའི་དུས་སུ་དམིགས་
47-42-5a
པ་འདི་བཞིན་བསྒོམ་མོ༔ རང་ཉིད་རྡོ་རྗེ་གཙུག་ཏོར་ཕྱག་སྟོང་དུ་ཡོད་པ༔ ཕྱག་ཐམས་ཅད་གཅོད་བྱེད་ཀྱི་རལ་གྲི་བསྣམས་པ༔ དབུ་སྟོང་དུ་ཡོད་པ༔ སྤྱན་བྱེ་བ་བརྒྱ་ཕྲག་འབུམ་དུ་ཡོད་པ༔ མེ་དཔུང་འབར་བའི་དཀྱིལ་ན་བཞུགས་པ་སྲིད་གསུམ་ཟིལ་གྱིས་གནོན་པ་གཅིག་ཏུ་བསྒོམ༔ སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་སྔོན་པོ་བསྒོམ༔ དེ་ཡང་སྤྱི་བོར་རྣམ་པར་སྣང་མཛད༔ མགྲིན་པར་སྣང་བ་མཐའ་ཡས༔ སྙིང་ཁར་རྡོ་རྗེ་སེམས་དཔའ་བསྒོམ་མོ༔ དམིགས་པ་འདི་བསྒོམ་པ་ཙམ་གྱིས་ངག་མནན་པ་དང་༔ བཅིངས་པ་ཐམས་ཅད་རང་གྲོལ་ལ་འགྲོའོ༔ རང་གི་ཡ་སོ་བཅུ་ལ་ཧཱུྃ་ལས་ཁྲོ་བོ་བཅུ་བསྒོམ༔ མ་སོ་ཧྲཱིཿལས་ཁྲོ་མོ་བཅུ་བསྒོམ༔ ལྕེ་རལ་གྲི་ངར་མར་བསྒོམ༔ སྨ་ར་མེ་དཔུང་འབར་བར་བསྒོམ༔ མགྲིན་པར་ཉི་མ་དང་ཟླ་བ་བསྒོམ༔ རང་ལུས་མེ་དཔུང་ཆེན་པོར་བསྒོམ༔ ལུས་ངག་ཡིད་གསུམ་ལ་གནོད་པའི་རིགས་ཐམས་ཅད་བྱ་སྒྲོ་མེ་ལ་བསྲེགས་པ་བཞིན་དུ་རྡུལ་བུན་གྱིས་ཚིག་པར་བསྒོམ༔ དེ་ནས་སྔགས་བཟླའོ༔ བཟླས་པའི་དུས་སུ་སྨྲ་བཅད་བྱའོ༔ ཤིན་ཏུ་ཟབ་པའི་གདམས་པ་འདི༔ སློབ་དཔོན་ཁྲག་འཐུང་ནག་པོས་རྡོ་རྗེ་གདན་གྱི་བྱང་ཕྱོགས་ནས༔ མཆོད་རྟེན་ཁྲི་འཕང་ནས་བཏོན་པའོ༔ འདིའི་བརྒྱུད་པ་ནི༔ སློབ་
47-42-5b
དཔོན་ཁྲག་འཐུང་ནག་པོ༔ སངས་རྒྱས་ཡེ་ཤེས༔ ཁྲོ་ཚང་འབྲུག་ལྷ༔ གཡུང་དྲུང་རྒྱལ་མཚན༔ བསོད་ནམས་རྡོ་རྗེ༔ སངས་རྒྱས་བློ་བདེ༔ སྲས་རྒྱལ་མཚན༔ བླ་མ་ཆོས་སྐྱོང་༔ བླ་མ་ཤཱཀྱ་སེངྒེ་ལའོ༔ འདིའི་ལག་ལེན་ལ༔ དེ་ནས་བླ་མ་ཡི་དམ་གྱི་ཕྲིན་ལས་གཞུང་བསྲང་༔ བུམ་པ་བསྐྱེད་ཆོག་བདག་བསྐྱེད་དང་མདུན་བསྐྱེད་གསལ་བའི་ངང་ནས༔ བྱད་འགྲོལ་གསེར་གྱི་ལྡེའུ་མིག་ངག་བཅད་པས་ཚར་བདུན་བཟླ༔ དེ་ནས་བྱད་དུ་བཅུག་པ་དེ་རེ་བ་གྲུ་གསུམ་པའི་སྟེང་དུ་བཞག༔ སྤྱི་བོར་སཱཙྪ༔ ཡན་ལག་ཚོན་སྐུད་ཀྱིས་བཅིང་༔ གོས་ནག་གཅིག་མགོ་ཞབས་བསྒྱུར་ལ་གོན་ཏེ༔ བསྐྱེད་རིམ་ཕོག༔ རང་ཉིད་བདག་བསྐྱེད་གསལ་བས་བྱད་འགྲོལ་བར་བྱའོ༔ ལོ་རྒྱུས་རྒྱས་པ་སོགས་གཞུང་ལོགས་སུ་གསལ་ལོ༔ དུམ་པ་རྒྱས་གཡུང་གི་རྫ་ལྷུད་མོ་ནས་བཏོན་པའི་གཏེར་གཞུང་ནས་གསལ་བར་ལོགས་སུ་འགྲོལ་བའོ༔ ༄༅༔ བྱད་འགྲོལ་གསེར་གྱི་ལྡེའུ་མིག་གི་ངག་འདོན་བཞུགས་སོ༔ རང་ཉིད་རྡོ་རྗེ་གཙུག་ཏོར་ཕྱག་སྟོང་དུ་ཡོད་པ༔ ཕྱག་ཐམས་ཅད་ལ་གཅོད་བྱེད་ཀྱི་རལ་གྲི་བསྣམས་པ༔ དབུ་ཡང་སྟོང་དུ་ཡོད་པ༔ སྤྱན་བྱེ་བ་བརྒྱ་ཕྲག་འབུམ་དུ་ཡོད་པ༔ མེ་དཔུང་འབར་བའི་དཀྱིལ་ན་བཞུགས་པ༔ སྲིད་གསུམ་ཟིལ་གྱིས་ནོན་པ་ཞིག་ཏུ་བསྒོམ༔ སྤྱི་བོར་ཨོཾ་དཀར་
47-42-6a
པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་སྔོན་པོ་བསྒོམ༔ དེ་ཡང་སྤྱི་བོར་རྣམ་པར་སྣང་མཛད༔ མགྲིན་པར་སྣང་བ་མཐའ་ཡས༔ སྙིང་ཁར་རྡོ་རྗེ་སེམས་དཔའ་བསྒོམ༔ དམིགས་པ་འདི་བསྒོམ་པ་ཙམ་གྱིས་ངག་མནན་པ་དང་༔ བཅིངས་པ་ཐམས་ཅད་འགྲོལ་ལོ༔ རང་གི་ཡ་སོ་བཅུ་ལ་ཧཱུྃ་བཅུ་ལས་ཁྲོ་བོ་བཅུ༔ མ་སོ་ཧྲཱིཿབཅུ་ལས་ཁྲོ་མོ་བཅུ༔ ལྕེ་རལ་གྲི་ངར་མ༔ སྨ་ར་མེ་དཔུང་འབར་བ༔ མགྲིན་པ་ཉི་མ་དང་ཟླ་བར་གྱུར༔ རང་ལུས་མེ་དཔུང་འབར་བས་དགྲ་བགེགས་བྱད་མ་གནོད་བྱེད་ཐམས་ཅད་གཞོབ་ཐུལ་གྱིས་བསྲེགས་པར་གྱུར༔ ཧཱུྃ༔ ཁྲོ་བོའི་རྒྱལ་པོ་བྱད་དང་ངག་འགྲོལ་བ་རྣམ་པར་རྒྱལ་བ་ལ་ཕྱག་འཚལ་ལོ༔ བདག་ཅག་གི་ལུས་ངག་ཡིད་གསུམ་ལ་ཕ་རོལ་གྱི་མི་དང་མི་མ་ཡིན་པས་བསམ་སྦྱོར་ངན་པ་དང་རྣམ་པར་སྡང་བ་དང་གནོད་པར་བསམ་པ་དང་༔ ངན་སྔགས་བྱེད་པ་དང་༔ བྱད་དུ་བཅུག་པ་དང་༔ གཏད་ཁྲམ་བྱེད་པ་དང་༔ རྦོད་གཏོང་བྱེད་པ་དང་༔ སྦྱིན་སྲེག་བྱེད་པ་དང་༔ ངག་མནན་པ་དང་༔ བཅིངས་པ་དང་༔ དམོད་མོ་བྱེད་པ་དང་༔ ཧོམ་དང་པར་བུ་བསྐོར་བ་དང་༔ རླུང་གི་འཁོར་ལོ་བསྐོར་བ་དང་༔ སྟེང་ལྷ་ཡིས་བཅིངས་པ་དང་༔ བར་ལྷ་སྲིན་སྡེ་བརྒྱད་ཀྱིས་བཅིངས་པ༔ ཕྲ་མེན་གྱིས་བྱད་དུ་བཅུག་ནས་ལུས་ངག་ཡིད་གསུམ་མནན་པ་དང་༔ བཅིངས་པ་ཐམས་ཅད་རྣམ་པར་གཞིག་ཏུ་
47-42-6b
གསོལ༔ རྣམ་པར་གཞོམ་དུ་གསོལ༔ ལུས་ངག་ཡིད་གསུམ་བཅིངས་པ་ཐམས་ཅད་ཁྲོལ་ཏུ་གསོལ༔ ངེས་པར་ཁྲོལ་ཏུ་གསོལ༔ མཐུ་བྱད་ཀྱིས་བཅིངས་པ་ཐམས་ཅད་སརྦ་ཨ་པ་ན་ཡེ་སྭཱ་ཧཱ༔ ལུས་བཅིངས་པ་ཕྱེ་ཕྱེ་ཁྲོལ་ཁྲོལ༔ ངག་བཅིངས་པ་ཕྱེ་ཕྱེ་ཁྲོལ་ཁྲོལ༔ ཡིད་བཅིངས་པ་ཕྱེ་ཕྱེ་ཁྲོལ་ཁྲོལ༔ ལུས་ངག་ཡིད་གསུམ་བཅིངས་པ་ཕྱེ་ཕྱེ་ཁྲོལ་ཁྲོལ༔ ནང་པ་སངས་རྒྱས་པའི་བདེན་པ་དང་༔ བར་པ་དྲང་སྲོང་གི་དམོད་པ་དང་༔ ཕྱི་པ་མུ་སྟེགས་པའི་སྦྱོར་བ་ངན་པ་ཐམས་ཅད་ཕྱེ་ཕྱེ་ཁྲོལ་ཁྲོལ༔ མི་ནོར་ཞིང་ཁང་ལ་གནོད་པ་ཐམས་ཅད་ཕྱེ་ཕྱེ་ཁྲོལ་ཁྲོལ༔ དབང་ཕྱུག་ཆེན་པོ་ཡབ་ཡུམ་གྱིས་བཅིངས་པ་ཐམས་ཅད་ཕྱེ་ཕྱེ་ཁྲོལ་ཁྲོལ༔ གཤིན་རྗེ་ཕོ་དང་གཤིན་རྗེ་མོས་བཅིངས་པ་ཐམས་ཅད༴ ཨེ་ཀ་ཛཱ་ཊི་དང་མ་མོས་བཅིངས་པ༴ བདུད་ཕོ་དང་བདུད་མོས་བཅིངས་པ༴ བཙན་དང་རྒྱལ་པོས་བཅིངས་པ༴ ཀླུ་དང་ཀླུ་མོས་བཅིངས༴ གནོད་སྦྱིན་དང་གནོད་སྦྱིན་མོས་བཅིངས༴ གཟའ་དང་གདོང་མོས༴ ཡུལ་ལྷ་དང་ཡུལ་འདྲེས༴ མུ་སྟེགས་ཕོ་མོས༴ སྲིན་པོ་དང་དམུ་ཡིས༴ རྡོ་རྗེ་ལེགས་པ་ཐེལ་འགོང་༴ མགོན་པོ་དང་ཨ་ཕྱིས༴ ཡུལ་འདྲེ་ཕོ་མོས༴ བགེགས་དང་འབྱུང་པོས༴ མཁའ་འགྲོ་དང་ཤུགས་འགྲོས༴ ཧལ་ཁྱི་ནག་པོ་འཁོར་དང་བཅས་པས་ལུས་ངག་ཡིད་གསུམ་
47-42-7a
བཅིངས་པ་ཕྱེ་ཕྱེ་ཁྲོལ་ཁྲོལ༔ འབྱུང་བ་ལྔས་བཅིངས་པ༴ ཕྲ་མེན་གྱི་སྦྱོར་བ་ངན་པ༴ ངག་མནན་གྱི་སྦྱོར་བ་ངན་པ༴ གཏད་ཁྲམ་གྱི་སྦྱོར་བ་ངན་པ༴ གཟའ་དང་སྡེ་བརྒྱད་མིང་སྲིང་གི་བྱད་དང་གཏད་ཁྲོལ་ཁྲོལ༔ ཀླུ་བརྒྱད་ཀྱི་བྱད་དང་གཏད༴ སྡེ་བརྒྱད་ཀྱི་བྱད་དང་༴ ལུས་ངག་ཡིད་གསུམ་གྱི་བྱད་དང་༴ ཤར་ནས་ཀླུ་སྦྲུལ་མགོ་གསུམ་པའི་བྱད་དང་གཏད༴ ལྷོ་ནས་ཀླུ་སྦྲུལ་མགོ་ལྔ་པའི་བྱད་དང་གཏད༴ ནུབ་ནས་ཀླུ་སྦྲུལ་མགོ་བདུན་པའི་བྱད་དང་༴ བྱང་ནས་ཀླུ་སྦྲུལ་མགོ་དགུ་པའི་བྱད་དང་༴ ཀླུ་རྒྱལ་རིགས་ཀྱི་བྱད་དང་གཏད༴ ཀླུ་རྗེ་རིགས་ཀྱི་བྱད་དང་གཏད༴ ཀླུ་དམངས་རིགས་ཀྱི་བྱད་དང་གཏད༴ ཀླུ་གདོལ་པའི་རིགས་ཀྱི་བྱད་དང་༴ ཀླུ་བྲམ་ཟེའི་རིགས་ཀྱི་བྱད་དང་གཏད༴ ཀླུ་བཙན་རིགས་ཀྱི་བྱད་དང་༴ ཀླུ་གཉན་རིགས་ཀྱི་བྱད་དང་༴ ཀླུ་སྲིན་རིགས་ཀྱི་བྱད་དང་༴ ས་བདག་འཛིན་པོས༴ སྡོམ་པོ་ཁྲ་བོའི༴ གྱོང་པོ་ཞ་བོའི་བྱད་དང་༴ གཟའ་ཀླུ་ས་བདག་རྗེ་བློན་གྱི༴ གཤིན་རྗེ་དང་ལས་གཤིན་གྱི༴ རྒྱལ་པོ་དང་རྒྱལ་འགོང་གི་བྱད༴ བཙན་དང་མ་མོའི༴ བདག་ཅག་འཁོར་དང་བཅས་པའི་ལུས་ངག་ཡིད་གསུམ་བཅིངས་པ་ཁྲོལ༔ བསྡམས་པ་ལྷོད༔ མནན་པ་ཐེགས༔ ཟོས་པ་སྐྱུགས༔ ཤི་བ་གསོས༔ 
47-42-7b
བསམ་སྦྱོར་ངན་པ་ལྷོད༔ ལུས་ཀྱི་དབང་པོ་ཕྱེ་ཕྱེ་ཁྲོལ་ཁྲོལ༔ ངག་གི་དབང་པོ་ཕྱེ་ཕྱེ༴ ཡིད་ཀྱི་དབང་པོ་ཕྱེ༴ བླ་བཅིངས་པ་༴ རུས་བཅིངས་པ་༴ མིང་བཅིངས་པ་༴ གཟུགས་བཅིངས་པ་༴ ཁ་རྗེ་དབང་ཐང་བཅིངས་པ་༴ བསྡམས་པ་དང་བཅིངས་པ་དང་མནན་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ བསྡམས་པ་བཅིངས་པ་མནན་པ་བྱད་མཐུར་བཅུག་པ་ཐམས་ཅད་ཛྭ་ལ་རཾ་རཾ་མཱ་ར་ཡ་ཕཊ༔ ཅེས་མནན་པ་ཐེག༔ བཅིངས་པ་རྣམས་ཆད་པར་བསམ༔ མེ་ཧོམ་ལ་ལན་བདུན་འགོང་༔ གོས་བསྒྱུར༔ བུམ་པས་ཁྲུས་བྱ་ཁར་འཐུང་༔ ཕྱོགས་གཙང་སར་སྡོད༔ དེ་ལྟར་ལན་གསུམ་གྱིས་གཏད་ཁྲམ་ཐམས་ཅད་དང་མཐུ་བྱད་ངན་སྦྱོར་ཐམས་ཅད་གྲོལ་བར་ཐེ་ཚོམ་མེད་དོ༔ ཞག་གསུམ་གྱི་བར་མི་དང་གནས་གདོན་ཆེན་གྲིབ་ཅན་སྤང་༔ ་ར་མཱ་སྔས་སུ་མི་འཇུག༔ ཤེས་རབ་རིགས་ངན་དང་མི་འགྲོགས༔ སློབ་མ་སྙིང་ལྟ་བུ་མ་གཏོགས༔ གང་བྱུང་བྱུང་གར་ཐོད་དུ་མི་བྱ༔ རང་ལ་ཟློག་ཉེན་ཡོད་དོ༔ ཤུ་བྷཾ༔ ༔


